t Evengelie volgens Lucas 20
01Op ain van dizze doagen gaf e t volk weer onderricht in tempel en hai verkundegde bliede bosschop. Dou kwammen opperpriesters en schriftgeleerden mit oldsten op hom òf en ze zeden tegen hom:
02"Zeg ons ais, wat veur recht heb ie om dat te doun. En wèl het joe t recht doartou geven?"
03Hai gaf heur as antwoord: "Ik wil joe ook wat vroagen.
04Zeg ie mie mor es: Johannes zien deup, woar kwam dij heer: van hemel of van mensken?"
05Ze onnaaierden onder nkander: "As wie zeggen 'Van hemel,' zel hai zeggen: 'Woarom wol ie hom den nait leuven?'
06Mor as wie zeggen: 'Van mensken,' den zel aal t volk hier ons mit stainen doodgooien. Ze binnen der ja van overtuugd: Johannes was n profeet!"
07Dou zeden ze, ze wozzen nait woar of dij heer kwam.
08Jezus zee tegen heur: "Den zeg ik joe ook nait mit wat veur recht of ik dit dou!"
09Dou keerde e zok noar t volk en vertelde heur dizze geliekenis: "Der was es ain, dij n droevetoen aanlegde. Hai verpachtte hom aan wienboeren en dou ging e n haile toer tou t laand oet.
10 Dou tied ter heer was, stuurde hai n knecht noar zien pachters tou, dat ze zollen hom zien paart van toenopbrengst betoalen. Mor ze raanzelden hom òf en stuurden hom mit lege handen weerom.
11 Hai luit t ter nait bie en stuurde nog es weer n knecht. Dij raanzelden ze ook òf, beschimpten hom en stuurden hom mit lege handen weerom.
12 Nog luit e t ter nait bie en stuurde n daarde. Mor dij toakelden ze ook tou en smeten hom tou droevetoen oet.
13 Dou zee boas van droevetoen: 'Hou mout ik ter nou mit aan? k Zel mien alderlaifste jong sturen. Dij zellen ze ja wel mieden!'
14 Mor dou pachters hom aankommen zagen, stoken ze koppen bie nkander en zeden: 'Dat is aarfgenoam! Loat wie hom doodmoaken. Den is aarvenis veur ons!'
15 Ze smeten hom tou toen oet en muiken hom dood. Wat zel boas van toen den mit heur doun?
16 Hai zel kommen, dij pachters ombrengen en droevetoen aan aandern geven." Dou ze dat heurden zeden ze: "Nooit van zien levensdoagen!"
17 Mor hai keek heur stief aan en zee: "Wat bedudt dij tekst den: 'Stain dij amtslu ofkeurd haren, dij is as houkstain bruukt'?
18 Elk dij doarover stroekelt, dij vaalt te pletter. En as ain hom op kop krigt, dij wordt vermorzeld!"
19 Schriftgeleerden en opperpriesters perbaaierden op dat aigenste ogenblik hom op te pakken. Mor ze wazzen baang veur t volk. Ze haren ja wel deur dat e mit dizze geliekenis heur maind haar.
20 Ze huilen hom in de goaten en stuurden spionnen op hom òf. Dij zollen net doun of ze t goud mainden, mor ze zollen hom op zien woorden vangen. Den konden ze hom oetlevern in handen van stadholder.
21 Ze vruigen hom: "Meester, wie waiten dat ie liekoet spreken en onderricht geven. En gain mensk noar ogen kieken, mor eerlieks zeggen hou of God wil dat je leven zellen.
22 Nou den: mag wie kaaizer ainlieks wel belasten betoalen of nait?"
23 Mor hai haar vot deur hou filaain of ze wazzen en zee tegen heur:
24 "Loat mie es n denarie zain! Wèl zien kop en opschrift staait ter op?" Ze zeden van: "Kaaizer zienent!"
25 Hai zee tegen heur: "Den geef aan kaaizer wat of kaaizer toukomt en aan God wat of God toukomt."
26 En zo konden ze, doar t volk bie ston, gain vat op zien woorden kriegen. Ze stonden versteld over zien antwoord en deden t swiegen der tou.
27 Nou kwammen ook gounent van Sadduceeërs bie hom. Dat binnen lu, dij ontstrieden dat doden opstoan.
28 Ze vruigen hom: "Meester, Mozes het ons veurschreven: as ain zien bruier komt te overlieden dij traauwd west het en gain kinder het, den zel dizze bruier dij wedevraauw traauwen en zo veur zien bruier veur noageslacht zörgen.
29 Nou wazzen der es zeuven bruiers. Eerste traauwde, mor sturf zunder kinder.
30 En twijde traauwde mit heur. En daarde ook.
31 Mor t ging mit ale zeuven netgliek: ze luiten bie heur dood gain kinder noa.
32 Op t leste sturf vraauw ook.
33 Dij vraauw nou, wèl krigt heur as vraauw as doden opstoan? Zai het ja mit ale zeuven traauwd west."
34 Jezus zee tegen heur: "Mensken dij in dit levent heuren, nemen n vraauw en kriegen n man.
35 Mor dijent dij goud genogt vonden worden om dat levent te kriegen en op te stoan oet dood, nemen gain vraauw en kriegen gain man meer.
36 Ze kinnen ja nait meer staarven. Ze binnen net zo as engels en heuren bie God as ze ainmoal t opstoan deurmoakt hebben.
37 Mor dat doden opstoan zellen, het Mozes ook al aandud as e vertelt wat of ter bie brandende brommelbos gebeurde. Doar nuimde hai de Heer: Abraham zien God, Isaak zien God en Jakob zien God.
38 God is ja nait doden heur God, mor leventegen heurent. Veur hom leven ze ja aalmoal!"
39 Gounent van schriftgeleerden zeden: "Meester, dat heb ie goud zegd!"
40 Ze duurden hom niks meer te vroagen.
41 Hai zee tegen heur: "Hou kinnen ze zeggen, dat de Christus n zeun van David is?
42 David zegt ja zulm in zien Psaalmbouk: 'De Heer het tegen mien Heer zegd: goa rechts van mie zitten,
43 en wacht mor even, den leg ik joen vijanden onder joen vouten.'
44 David nuimt hom dus Heer. Hou kin e den zien zeun wezen?"
45 Dou zee e tegen zien leerlingen, en aal t volk heurde dat:
46 "Woar joe veur schriftgeleerden. Dij maggen geern in laange mantels lopen. Ze binnen der op gesteld dat mensken heur op maart goiendag zeggen. In sinagoge willen ze geern op veurste rieg zitten en bie moaltieden bovenaan.
47 Dij wedevraauwen heur hoezen opeten. En om zok mooier veur te doun, stoan ze laank te beden. Zokke lu zellen swoarder straft worden!"
|
